ኢትዮጵያ በመስቀለኛ መንገድ ላይ-የስነጥበብ አውደ-ርዕይ በቦልቲሞር፤ ሜሪላንድ
ኢትዮጵያ በመስቀለኛ መንገድ ላይ “Ethiopia at the Crossroads” የሚል ስያሜ የተሰጠው የኢትዮጵያን የ1750 አመት ታሪክ ከዘመናዊ የስነጥበብ ስራዎችጋ የሚቃኝ የስነጥበብ አውደ-ርዕይ በዎልተር የስነጥበብ ሙዚየም ከዲሴምበር 3 2023 እስከ ማርች 3 2024 ለህዝብ ክፍት ይሆናል።
ይህ አውደ-ርዕይ የኢትዮጵያ ስነጥበብ ታሪካዊ አንድምታን የሚቃኝ ሲሆን ኢትዮጵያ በአለም መድረክ ላይ የነበራትን ኃይማኖታዊ፤ ባህላዊና ሰብዓዊ መስተጋብሮችን ኢትዮጵያውያን አርቲስቶች በየዘመናቸው የገለጹበትና ከሌሎች ሀገራትጋ የነበራቸውን መስተጋብር ያሳያል ተብሏል። የአውደ-ርዕዩ አዘጋጆች ከኢትዮጲክ ባልደረባ ከሔኖክ ጋር በነበራቸው ቆይታ ከ220 በላይ ቅርሶችና የስነጥበብ ቁሶች ለዕይታ እንደሚቀርቡ አስረድተዋል። ከስር ባለው ቪድዮ ሙሉ ቃለመጠይቁን ይመልከቱ።
በዚህ አውደ-ርዕይ ል አይ በተጨማሪም የዘመናችን የስነጥበብ ባለሞያ የሆኑት እነ ወሰነወርቅ ኮስሮፍና አይዳ ሙሉነህን የመሳሰሉ አርቲስቶች ስራዎች ለዕይታ ይቀርባሉ። ይህ አውደ-ረዕይ በ ዎልተርስ አርት ሙዚየም፤ በፒበዲ ኢሴክስ ሙዚየምና በቶሌዶ ሙዚየም ትብብር የተዘጋጀ ሲሆን ቅርሶቹና የስነጥበብ ስራዎቹ በኤፕሪል ወር 2024 ወደ ኢሴክስ በኦገስት 2024 ደሞ ወደቶሌዶ በመሄድ ለእይታ ይቀርባሉ። በዚህ አውደ-ርዕይ ላይ ከስነጥበባዊ ስራዎች ባሻገር በርካታ ፕሮግራሞች ለታዳጊዎችም ለአዋቂዎችም ተዘጋጅቷል።
ይህን አውደርዕይ ማንኛውም ሰው ከዲሴምበር 3 ጀምሮ በ 600 N Charles St, Baltimore, MD 21201 በመገኘት በነጻ ሊጎበኘው እንደሚችል የዎልተር የስነጥበብ ሙዚየም የህዝብ ግንኙነት ኃላፊ የሆኑት ሲድኒ አዳምሰን ለኢትዮጲክ ተናግረዋል።
ለመረጃው አባይ ገብሬን እናመሰግናለን።
About Author
