በእለተ አርብ ኤፕሪል 5 ምሽት 11፡21 ላይ የዲሲ ፖሊስ የስልክ ጥሪ ደርሶት ወደ 1300 ፒበዲ ስትሪት አቅራቢያ ባለ አፓርታማ ውስጥ በጩቤ ተወግቶ የነበረውን የ53 ዓመቱን ጎልማሳ ፋሲል ተክለማርያምን ያገኙታል፡፡ በወቅቱ ለአደጋው የደረሱት የዲሲ ፖሊስና አምቡላንስ የመጀመሪያ አደጋ ደራሾች ታዲያ ፋሲል በደረሰበት ጉዳት ለህልፈት እንደተዳረገና ከሞተም አራት ቀን እንዳለፈው አረጋግጠዋል፡፡ በወቅቱም ፖሊስ ተጨማሪ መረጃ ያለው ሰው እንዲጠቁም የ25000$ ሽልማት እንዳዘጋጀ አስታውቆ ነበር፡፡
ጁን 21 ላይ ታዲያ ወንጀሉን ሲመረምር የነበረው የዲሲ ፖሊስ በፋሲል ህልፈት ጠርጥሬዋቸዋለሁ ያላቸውን የ22 ዓመቷን ቲፋኒ ቴይለር ግሬይና የ19 ዓመቷን ኦድሪ ሚለርን በቁጥጥር ስር እንዳዋለና ለፍርድ እንዳቀረባቸው አሳውቋል፡፡ የክስ መዝገባቸው እንደሚያሳየውም ፋሲል ጭንቅላቱና ሆዱ ላይ በደረሰበት ጉዳት ለህልፈት እንደተዳረገና በተጨማሪም በርካታ ቁስልና መላላጥ እግሩና እጁ ላይ እንደነበር ተገልጿል፡፡
በተጨማሪም በአስከሬን ምርመራ እንደተረጋገጠው ፋሲል ለህልፈት በተዳረገበት ወቅት የፋሲል አውራ ጣት እንደተቆረጠ ታውቋል፡፡ የተቆረጠው አውራጣትና የፋሲል ስልክ፤ ላፕቶፕና ሌሎች ማናቸው ኤሌክትሮኒክሶች በአፓርታማው እንዳልተገኙ ታውቋል፡፡
በፖሊስ ምርመራ የተገኙና ለፍርድ ቤት የቀረቡ ምስሎችና ዶክመንቶች እንደሚያሳዩትም ፋሲልና ተጠርጣሪ ኦድሪ ሚለር ከመሞቱ 4 ቀን በፊት ወደ አፓርታማ አብረው ሲገቡ እንደታዩ የሴኩሪቲ ካሜራ ላይ ታይተዋል፡፡ ለፖሊስ ከተላኩ በርካታ ጥቆማዎችና ከበርካታ የአይን ምስክሮች እንደተሰማውም ፋሲል ተክለማርያም የ22 ዓመቷ ቲፋኒ ቴይለር ግሬይ ሹገር ዳዲ እንደነበር ተነግሯል፡፡
በተጨማሪም ምስክሮች ከፋሲል ህልፈት በኋላ ተጠርጣሪዋ የሟችን አውራጣት በመጠቀም ገንዘብ ከካሽ አፕ አካውንቱ ስታወጣ እንደነበርና ለኡበር፤ ለአደንዛዥ ዕጽና ለአልክሆል ስትከፍል እንደነበር ተናግረዋል፡፡
ግሬይና ሚለር በመሳርያ በታገዘ የአንደኛ ደረጃ የነፍስ ማጥፋት ወንጀል ተከሰው ፍርዳቸውን እየተጠባበቁ ይገኛሉ፡፡
ለጥቆማው ራስ አስራትንና ጆን ጉድማንን እናመሰግናለን፡፡
About Author
